Kategoria: Hankak lurrean

Podcast: Play in new window | Download

Gaurko saioak bi adar nagusi  nagusi izango ditu, batetik, garaiko produktuen eta errezeten atalean, gure Arzank chef handia izango dugu. Negu bete beteko barazki bat bertaratuko digu: Azalorea. Honen historia eta propietateak xehatzeaz gain, azalorea saltsa berdean egina aurkeztuko digu, primeran neguko handikeriak jaisteko! Bestetik, Vista-Alegre auzotik, auzo konposta nola egin eta gauzatzen duten azalduko digute. 2012tik hona ari dira konpost-alegreko kideak horretan eta gaurkoan gela arrosara ekarriko digute euren ahotsa. Ostegunero bezala, 19:30 20:30 artean ON egin beraz!

Podcast: Play in new window | Download

Aste honetako irratsaioan batetik Sara Letamendia izango da gurekin, ohiko sendabelarren atalean, neguko hotz eta gaitzentzat  gure eskura jarabe paregabea bertaratuko digu aizarnarrak: Katarro, eztul, eztarriko min eta bronkioetako arazoentzat jarabe paregabea alegia. Bestetik, proiektu interesgarri baten gainean jardungo dugu ttirriki ttarrakan. Azpeitiko Sakona Komuntzo baserri edo etxaldeko Aiora Etxeberria eta Ioritz Igarataundik sorturiko proiektuaren berri izango dugu. Duela zenbait urte hasi baziren ere barazki ekologikoak ekoizten dagoeneko hainbat saltsatan lan egiten dute; fruituak, kontserbak…  Badakizue beraz aste honetan urteko azken irratsaioa ez galdu!  Ostegunero bezala 19:30-20:30 artean. OSASUNA ETA ASKATASUNA!

Podcast: Play in new window | Download

Gaurko saioan pinuen gaitza edo hobe esanda gizakion gaitza pinuetan islatua aztergai izango dugu ttirriki-ttarrakan. Honetarako Aitziber Sarobe biologo eta Arkamurkako kidea izango dugu. Gaitzaren nondik norakoak , basogintzaren egoera  eta eman nahi diren “alternatiba” edo ihesbideak izango ditugu aipagai elkar lan berri bati hasiera emanez.  Bestetik, sagardo denboraldia ate joka dagoen honetan Euskal Sagardoa izendapenaren koordinatzaile eta bertsolari ezaguna dugun Unai Agirre izango da gurean. Euskal Sagardoa bertan ekoizturiko sagarrez bakarrik osatua  eta kalitate berme baten ziurtagiria duen sagardoa da, honetaz gain, sagardoaren eta sagardotegien munduan murgilduko gara, bertako egin beharrak ohiturak eta bestelako ezagupenak jasotzeko asmoz. Ostegunero zuzenean 19:30-20:30 artean.  On egin!

Podcast: Play in new window | Download

Garaian garaikoa ta goxo egindakoa, hauxe da  Arrik hasi berri duen atala ttirriki-ttarrakan. Lehenengo honetan, erremolatxa ekarri digu gela arroxera, Askotan baztertua edo ahaztua dugun barazki honen historia, bere ezaugarriak eta gora beherak kontatzeaz gain, salmorejo koloretsu bat aurkeztu digu errezeta modura. Bestetik, Goiabeko Asier Baztarrika izan dugu, euren proiektuaz eta batez ere ogiaren inguruan jardun dugu hizketan, ogitik hasi eta mundua aldatzeko asmotan geu ere puztu gara legamiaren eraginez edo… Horretaz gain,  EHkolektiboa ere izan dugu mintzagai, Euskal Herri mailan ekologia, elkarlana eta konpromisu sozialean oinarrituriko sarea eta dinamika. ON EGIN!

Podcast: Play in new window | Download

Ostegunean hutsik egin gabe ttirriki-ttarraka (hankak lurrean) irratsaioa izango dugu. Datorren larunbatean San Prudentzion izango den  Ezkurra basotik-ahora ekimena aitzakia bezala hartuta Goiabeko  Leire eta Asier izango dira arraioko gela arroxan. Duela hainbat urte sortutako proiektuaren berri emango digute bertatik bertara. Bestetik, kolaborazio berri bat izango dugu saioaren hasieran,hileko lehen ostegunetan bertaratuko zaiguna  hain zuzen, garaiko produktuak, garaian garaiko elikagaiekin egindako errezeta sugerente bezain sanoak ekarriko dizkigu izenik ezin esan dezakegun hileroko gure kolaboratzaileak, basque kukinary centerretik guregana zuzenean etorriak. Horixe ba, ostegunero bezala arratsaldeko 19:30etatik 20:30etara arraioko uhin libreetan elkar topatuko dugu .Osasuna eta askatasuna!